Labur esanda, zazpi funtzionario behar ditu Udalak hainbat sailetako postuetarako; bitarteko funtzionario bi –arkitektoa eta ehorzlea– eta Udalarekin lotutako hiru lan poltsa betetzea.
Frogak, irailean
Berez, oraindik ez dago izena emateko data zabalik. Izan ere, halako deialdi bat egiteko prozedura luzea izaten da: Udalak deialdia argitaratu eta gero, Gipuzkoako Buletinera bidali behar dira oinarriak, eta gero, Madrilera, BOEn (Estatuko Buletinean) argitara dezaten. Horregatik, Udaleko Enplegu Sailak (deialdia egin duenak) oraindik ez daki zein data izango duen lanpostuetarako izenak hartzen hasteko.
Dena den, udako oporrak gainean ditugula kontuan hartuta, Udalak eskatuko du irailera begira argitara dezatela deialdi hori: "Ahaleginduko gara eskatzen deialdia abuztu amaieran argitara dezaten. Horrela, izenemate epea irailaren hasieran izango litzateke. Dena den, ezin dugu seguru esan lortuko dugunik", adierazi du Enplegu Zerbitzuak.
Behin deialdia argitaratuta, 20 egun natural izango dira izena emateko. Hori egin beharko da Biztanleen Arreta Zerbitzuan, bulego orduetan. Bestalde, lanpostuen oinarriak-eta udal webgunean daude argitaratuta.