2008ko uztailean hasi ziren lanak. Saihesbideak bi kilometro eskas –2014 metro– izango ditu luzeran, baina herriko trafikoa nabarmen arinduko du. Aldundiak obra egiteko beharra ikusi zuen, eta Oskar Rekalde Aldundiko Errepide saileko prentsa arduradunak jakinarazi duenez, "tamaina handiko arazoari, tamaina handiko irtenbidea eman diogu". Aurrekontua ikusi besterik ez dago: 40 milioi euro bi kilometro eskas izango dituen saihesbidea egiteko.
Tunela, zailtasun handiena
Hainbat elementu jasotzen ditu proiektuak: iparraldeko sarbidean, Aramaio errekaren gainetik doan zubia eta Markuleten eta Mugarrin egingo dituzten biribilguneak, besteak beste. Hala ere, Olandixoko tunela da saihesbidea egiteko zailtasun handiena, zalantza barik. Hori ez da berria, izan ere, Rekaldek jakinarazi duenez, "tunelak izaten dira halako obren zailtasun nagusiak". Olandixoko tunela egitea bereziki zaila izan da inguruko lurra oso ezegonkorra delako. 800 metroko luzera izango du tunelak eta Aldundiak, eskualde mailako errepidea izango dela kontuan hartuz, ahalegin berezia egin du obra horretan.
Izan ere, autopista bat egiteko baliabideak eta aurrekontua eskaini zaio tunelari. Rekaldek gaineratu duenez, "halako obra batentzat hainbeste bitarteko erabiltzea ez da batere ohikoa".