Goizeko 10ak hogei gutxiagotan gertatu da ezbeharra, AP-1 autopistako Arrasateko irteeran. Hain zuzen ere, Gasteizko noranzkoan zihoan kamioi batek kontrola galdu eta ondorioz iraulita gelditu da bi noranzkoen erdibitzailean. Istripuaren eraginez, kamioko gidaria barruan harrapatuta gelditu da eta suhiltzaileek bi ordu behar izan dituzte gidaria kabinatik ateratzeko. Ondoren, ospitalera eraman dute, zaurituta. Ertzantzaren iturrien arabera, besoan zuen gidariak zauririk handiena, baina zorionez, haren egoera ez da larria. Kamioiak, arrain olioa zeraman barruan, eta istripuaren ondorioz zama galdu du. Olioa, errepidera ez ezik, errekara ere erori da.
Istripuak eraginda, autopista itxi egin behar izan dute bi noranzkotan eta trafikoa Bergaratik desbideratu.
AP-1 autopistako langileek adierazi digute, eguerdiko ordu bietan, errepideak itxita jarraitzen zuela eta denbora beharko zela gainera, dena bere onera bueltatu eta errepideak normaltasuna berreskuratzeko.