Anbrosio Fernandez terrorismoaren biktima izendatzea eskatu du bere familiak

Anbrosio Fernandezen familia jarri da Jaurlaritzak terrorismoaren biktimei laguntzeko duen zuzendaritzarekin harremanetan eskaera Barne Ministeriora egin dezan.
79 urteko gizonezkoa zapatuan hil zen Txagorritxu Ospitalean. Jokin Zaitegi kalean La Caixak duen bulegoaren kontrako erasoaren ondotik ospitaleratu zuten Fernandez, arnas arazoengatik. Aurrez gaixotasun larriak izandakoa zen gizonezkoa eta urtarrilaren 5eko gertakariek ez zioten onik egin.

Erasoa gertatu zenean, Terrorismoaren Biktimei Laguntzeko Zuzendaritzakoak haren familiarekin harremanetan ipini ziren, eta zubi-lanak egin zituzten Fernandez terrorismoaren biktima izendatzeko Barne Ministeriora beharrezko dokumentuak bidaliz.

Espedientea zabalik dago eta azterketak egiten dabiltza orain. Bien bitartean, Auzitegi Nazionalak Fernandezen mediku-txostena eskatu du erasoaren eta heriotzaren arteko erlazioa egiaztatzeko.
Terrorismoaren biktima  izendapen eskariak baiezko erantzuna jasotzen badu, Fernandezen sendiak indemnizazioak jasoko ditu.

Gainerako bizilagunei dagokienez, jasandako kalte materialak gestionatzen ari dira. Aseguruen Konpentsazio Partzuergoak ordainduko die kalteen zatirik handiena eta Terrorismoaren Biktimei Laguntzeko Zuzendaritzatik jasoko dute gainerakoa.



ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.