Albiste pozgarria argazkilaritza maite dutenendako: bihar, egubakoitza, helduko da Arrasatera Naturaren argazkilariak 2009 erakusketa. Hala, Kulturateko klaustroan naturak utzitako irudi ikusgarriz osatutako argazki bilduma izango da ikusgai. Guztira 83 argazki ipiniko dituzte paneletan. Eraksuketa hilabetez egongo da zabalik; abenduaren 6ra arte, hain justu. Hori bai, astelehenetan itxita egongo da. Honakoa da ordutegia: martitzenetik domekara, 17:30etik 20:30era.
Goi mailako argazkilaritza
Naturako argazkilaritza lehiaketa entzutetsuena da Naturaren argazkilariak. 1964an sortua, makina bat argazki jasotzen dira urtero. Iaz, esaterako, 32.350 erretratu jaso zituzten, 82 herrialde ezberdinetatik. Datu hori nahikoa da erakusketarako aukeratzen diren argazkien kalitateaz konturatzeko. Zalantzaren bat duenak, bisita dezala erakusketa.
Naturaren edertasuna islatzea
Lehiaketaren helburua da naturaren edertasuna jaso eta erakustea. Horretarako mundu osoko argazkilari profesionalei zein zaletuei deia luzatzen zaie. Emaitza, esan moduan, Kulturaten ikusgai abenduaren 6ra arte.