'Ama Zerrajera' liburuaren 203 ale besterik ez dira gelditzen

Oraingoz, "Ama Zerrajeraren" mila ale atera dituzte, baina soilik 325 ipini dituzte salgai, gainerakoak banatu egin zituzten-eta. Juan Ramon Garaik Arrasate Irratiari aditzera eman dionez, oso zaila izango da liburuaren beste tirada bat egitea; hori egin ahal izateko gutxieneko liburu kopuru jakin bat argitaratu behar izaten delako.

Hori horrela, orain 203 ale besterik ez dira gelditzen. Eta oraingoz, ez dituzte berriak argitaratuko. Beraz, interesa izanez gero, adi ibiltzea komeni da.

Liburua 10 eurotan dago salgai.

Zerrajeraren historia

"Ama Zerrajera" liburua joan den ekainaren 22an argitaratu zuten.  Juan Ramon Garaik, Josemari Velez de Mendizabalek eta Jose Angel Barrutiabengoak idatzi dute. Garai eta Barrutiabengoa Zerrajerako langileak dira; Velez, berriz, 20 urtez hango langilea izateaz gainera, historialaria ere bada. Hala, "Ama Zerrajera" liburuan, Velez de Mendizabalek enpresaren historia landu du; Barrutiabengoak anekdotak eta Garaik langileen mugimendu eta aldarrikapenak.

Liburua euskaraz eta gaztelaniaz, bietara egin dute. 100 bat argazki batu dituzte barruan.

Duda barik, Arrasateko historiaren zati garrantzitsuaren lekukotasuna batu dute orrialde horietan.