Alternatiba-Zutik koalizioak eta Aralar udal taldeak hileta zibilak egin ahal izateko araudia aurkeztu dio Arrasateko Udalari. Araudi hori egiteko Eskoriatza eta Legazpiko omenaldi edo hileta zibilak hartu dituzte aintzat. Araudia aurkezteaz gain, eskaera ere egin diote halako ekitaldietarako Udalak "leku aproposa" eta "baliabideak" abiaraz ditzan. Adibidez, une horretan Udalak "familiari laguntzeko gertu egongo diren boluntarioen zerrenda" bere esku izatea ondo legokeela uste dute. Finean, gizartean "gero eta handiagoa" den beharrari erantzun behar zaiola diote.
Lekuen beharra
Hileta zibiletarako behar den lekuari dagokionez, bi eskaera egin dituzte: batetik, "leku finko eta irekia" izatea, "aterpe gune" batekin. Adibidez, Aldaiko parkea. Eta, bestetik, "leku itxi finkoa" ere "beharrezkoa" ei da. Esaterako, egungo hilerria, "udal tanatorioa han dagoela aprobetxatuta". Gunea egokituz gero leku aproposa dela uste dute. Hala materiala bertan gorde ahalko litzateke.
Funtzionatzeko proposamena
Araudi zirriborroak hileta zibilen garapena bermatzeko hainbat aspektu aurreikusten ditu; udal lokalen ordutegiak zehazten dira, adibidez. Horretarako, baina, udal agintariek proposamenari bidea eman beharko diote.