Altamirakoen eskaera, momentuz, bertan behera

Arrasateko Udalak atzera bota du, momentuz, Altamirako auzotarrek euren etxeetara iristeko dauden irisgarritasun arazoak konpontzeko egindako eskaera. Udalaren esanetan, irisgarritasuna bermatzeko irtenbide posibleak jasotzen dituen ikerketa eginda dute; hala ere, oraingoz ez dute halakorik gauzatuko eta hurrengo aurrekontuetan kontuan hartuko dute Altamirakoen eskaera, eta "lehentasun eta beharren arabera", aztertuko dute "zer eta noiz egin daitekeen zerbait".

Aspaldiko eskaera da Altamirakoek Udalari orain berriro ere egin diotena. Kontua da Altamira auzoko goiko etxebizitzetara iristeko aldapa handia eta eskailerak daudela, eta auzotarrek gurako lukete igogailua bukatzen den lekutik, hau da, Jose Luis Iñarra kaletik, euren atarietaraino pasabide bat egitea, bidea erraztuko diena.

Urbanoa ere ezin

Eskatu izan dute, baita ere, Arrasateko urbanoaren ibilbidea luza dezatela euren atari aurreraino iristeko. Baina horrekin ere arazoak dituzte Zerbitzu Sailean, urbanoaren ordutegiak ezin egokitu dabiltzalako.

Altamira guneko 10 atariko auzotarrak dira kexu direnak 21. zenbakitik 31. zenbakirainokoak.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.