Datozen egunetan batzartuko da gainontzeko ordezkari politikoekin alderdi sozialista 'Arrasateko etorkizunaz hitz egiteko'. Horren harira, Paco Gartziak berretsi egin du "aukera guztiak zabalik" daudela kazetari batek prentsaurrekoan ea zentsura moziorik aurkeztuko duten galdetu dioenean. Hala ere, gehitu du "duintasunagatik, alkateak eta EAEko zinegotziek dimititu" egin beharko luketela eta "demokratei laga herria gobernatzen". Hauteskundeetako balorazioa egiteko egin dute sozialistek gaur agerraldia hedabideen aurrean eta Gartziak esan du "domekako boto bakoitza Isaiasen senideei emandako besarkada" izan dela eta "ETAren aurkakoa". Arrasateko sozialisten buruak bukatu du zehaztuz udal gobernuari buruzko balorazio gehiago ez dutela egingo talde politiko guztiekin berba egin arte.
'Martxoaren 9an demokrazia eta askatasunarengatik bozkatu zela' esanez hasi dute gaurko agerraldia Arrasateko sozialistek. Paco Gartziak esan du euretako "bakoitzak sufritu eta bihotzetan sentitu" dutela Isaias Carrascoren senideen dolua. 'Euren biziei atzera ekiteko kemen eta indarrarengatik eredu' direla esan du Gartziak.
Adierazpenetan, era berean, aipamen zehatza egin die bere hitzetan "bihozgabe" diren horiei; 'alargun eta alabaren saminaren aurrean hunkitzen ez diren horiei'. Gartziak galdetu du ea zergatik ilegalizazioen aurrean mobilizatzen diren eta ez hilketaren aurka. ETArekiko "zero tolerantzia" izateko deia egin du ordezkari sozialistak eta "isiltasunak konplize" egiten dituela.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak