19:00ak inguruan, aretoaren kanpoaldean txalaparta jotzen zuten bitartean, apurka-apurka Kulturateko areto nagusia betetzen joan da. Eserlekuak beteta jendea atzealdean zutik geratu behar izan da. 200 pertsona inguru joan dira AEDren urteurrena ospatzera.
Erakundeen hitzaldiekin hasi da omenaldia. Arrasateko alkateak hartu du lehenengo hitza. Ino Galparsorok AEDren ausardia nabarmendu du euskararen gizarteratze prozesuan. Topaguneko lehendakari Karmen Irizarrek hitz egin du, gero. Euskararen alde bihotzetik lan egindako guztiei eskerrak eman dizkie Irizarrek: "Gaur AEDren ekitaldi honetan izatea plazerra eta ohorea da niretzat". Azkenik AEDko idazkari nagusiak, Eñaut Muxikak, hartu du hitza. Eskerrak eman diziki AEDren 25 urteko ibilbidea posible egin duten guztiei, baina, gogorarazi du etorkizunerako lan asko dagoela egiteko oraindik.
Hitzaldiak amaituta musikaren txanda etorri da. AEDren 25. urteurreneko abesti famatua ipini dute, Jokin Labaienek eta Gose taldeak elkarrekin egindakoa: 'Ez gorde museoetan'. Ondoren Goikobalu abesbatzak hiru kantu abestu ditu. Momentu unkigarrienetako bat izan da Goikobalukoek Mikel Laboaren 'Txoriak txori' abestia kantatu dutenean. Aretoa guztia Laboaren kantu famatua abestera batu da. Txalo zaparrada itzela izan da eta ondoren Mikel Laboaren gaineko bideoa ipini dute. Momentu berezia eta polita izan da.
Bertsolarien txanda iritsi da ondoren. Jokin Labaien eta Xanti Iparragirrek bertsotan jardun dute.
Sorpresa etorri da gero Maider Osa aurkezleak Lehendakaritzarekin zuzenean konektatuko zutela iragarri duenean. Izan ere, Lehendakaritzan Ukan 2008 sariak banatzen ziharduten. Kulturaten batutakoek zuzenean ikusi ahal izan dute AEDk nola jaso duen Ukan 2008 sari nagusia. Ander Etxeberriak jaso du Gasteizen saria.
Ekitaldia aurreskuarekin bukatu dute.