Asteon onartu du Udal Gobernuak 2009ko dirulaguntzen deialdia: 868.870 euro, herriko elkarte eta taldeen artean banatzeko. Iazko kopuruarekin konparatuz gero, 10.000 euro pasatxoko jaitsiera dago aurtengo kopuruan.
Orain, deialdia Gipuzkoako Buletin Ofizialera bidaliko dute eta han argitaratu ostean, hilabeteko epea zabalduko dute eskaerak jasotzeko. Epe zehatza jakin barik, jeneralean, abuztuko oporraldiaren aurretik egin behar izaten dira eskaerok.
Eta adi ibiltzea komeni da. Izan ere, iaz bezala, aurten ere ia elkarte guztiek epe berean aurkeztu beharko dituzte eskaerak.
Eskabide orriak
Laguntzak eskatzeko eskabide orria bete beharra dago eta hori eskura daiteke herriko bost lekutan: Biztanleen Arreta Zerbitzuan, Gazte Informazio Bulegoan, Emakume Txokoan, Musakolako kiroldegian eta Arrasateko Udalaren webgunean (www.arrasate-mondragon.org).
Bi bide daude, berriz, eskaera horiek aurkezteko: Biztanleen Arreta Zerbitzuan edo Musakolako kiroldegian (kirolarekin lotutako dirulaguntzetarako).
Igogailuak eta eguzki plakak
Arrasateko Udaleko hamar sailek parte hartuko dute dirulaguntzen aurtengo deialdian.
Programei dagokienez, berriz, 25 dira, iaz baino bi gehiago; izan ere, bi ekimen berrirendako laguntzak izango dira aurten: igogailuak ipintzeko eta eguzki plakak ipintzeko dirulaguntzak, hain zuzen.
Giza beharretarako
Horrez gainera, laguntza orokorrak sailka begiratuta, adibidez, laguntza emango dute Gizarte Ongizate Sailean: erretiratuen elkarteendako, udal tasak ordaintzeko diru baliabide urriak dituztenendako, espetxean preso dauden pertsonen senideen garraio gastuetarako, garatzeko bidean lankidetza programak egiten dituzten gobernuz kanpoko erakundeei laguntzeko eta droga mendekotasunen eta beste mendekotasun psikologikoen tratamendurako.
Enplegu Sailetik, berriz, lanpostu berriak sortzeagatik laguntzak emango dizkiete enpresei.
Euskara ikasteko eta beste
Euskara Sailean, euskaltegietan euskara ikasten dabiltzanei, Udako Euskal Unibertsitatean parte hartzen dutenei edo, adibidez, errotuluak, irudi korporatiboa eta webgunea euskaraz egiten duten enpresa eta komertzioei emango dizkiete laguntzok.
Eta beste adibideren bat ipintzearren, gazte eta kultura elkarteendako, gizon eta emakumeen berdintasuna bultzatzeko edo ingurumenarekin lotutakoak bultzatzeko laguntzak izango dira.