Zati garrantzitsua
Zati txiki samarra da idatzi behar duten proiektukoa, 400-600 metro inguruko bidegorria, baina badauka garrantzia; izan ere, behin eginda, Arrasaten eginda dagoen oinezkoen edo bizikleten ibilbideak jarraipena izango du kanpoko auzo haietara. Hain justu, Garaia Berrikuntza Gunetik Garagartzan estreinatu berri dituzten ortu ekologikoetaraino, Fagor lantegiraino edo Garagartza-Gesalibar auzoetaraino joan ahal izango da automobila erabili barik, oinez zein bizikletaz.
Hain zuzen ere, honako ibilbide hauxe izango du bidegorriak: Ibarretako eremutik pasatu, Fagor lantegiaren atzeko aldetik segi eta Arteagara doan bidearekin bat egingo du. "Behin proiektua idatzita, asmoa da lehenbailehen eraikitzea", adierazi du Izaro Agirrek, Udaleko Obra eta Zerbitzu Saileko teknikariak.
