Esperientziaren Eskolaren antolatzaile den MUGABE elkarteko Arantxa Arrieta, Arrasateko Udaleko Yolanda Perez de Arenaza zinegotzia eta Udaleko gizarte ongizateko atalburu Iñigo Garitano izan dira, baita aurreko ikasturtean ikasle izan zirenek eta ikasturte berrian ikasle izango direnak ere.
Ekimen arrakastatsua
Iaz 23 ikaslek parte-hartu zuten Arrasateko Esperientziaren Eskolan, eta ia denek diploma jaso dute gaurko ekitaldian. Aitziber Indart arduraduna oso gustura agertu da lehen ikasturtearen martxarekin, eta adierazi du horren adibide dela ikasturte berrirako izan duten eskari piloa. ''Aurreko urteko ikasleek gomendatuta, jende asko apuntatu da aurten, eta horrek esan gura du gustura geratu zirela ikasleak'' esan du Indartek. Ikasle izandakoek eurek eskatuta gainera, ikasketa iraunkorreko ikastaroa egingo dute aurten.
Esperientziaren Eskolari berari dagokionez, 30 izango dira aurten parte hartuko duten ikasleak, eta askotariko gaiak jorratuko dituzte bertan: historia, informatika edo filosofia esaterako. Parte-hartzea da erabiltzen duten metodologiaren ardatza, eta asmoa da esparru ezberdinetan formazio eguneratua jasotzea.
Aitziber Indarten esanetan, ez du inporta ikasleek duten aurretiko formazio mailak, izena emateko baldintza bakarra da 50 urtetik gorakoa izatea baita.
Astearte eta asteazkenetan izango dira Esperientziaren Eskolaren klaseak, beti ere goizez. Eta arduradunek esan digutenez, aurten lekurik ez, eta datorren urterako dagoeneko hainbatek eman dute izena. Interesa dutenek, 943 22 41 46 telefonora deitu behar dute. Esan behar da baita ere, Eskola bera Arrasaten dagoen arren, Debagoieneko edozein herritarri dagoela irekita.