Abaroako taberna bi urtez egongo da itxita egoitza berria zabaldu arte

Egoitza zaharreko taberna martxoaren 2an itxiko dute behin betiko; gainerako instalazioek zabalik jarraituko dute egoitza berria egin arte. Ia bi urtez taberna zerbitzu barik geratuko da Abaroa. Martxoaren 1a, hauteskunde eguna, izango da egoitza zaharreko tabernaren azken eguna, eta ordutik eta San Andres auzoan egingo duten egoitza berria zabaldu arte, erretiratuek ez dute tabernarik izango. Abaroa gaineko Iturbide egoitzako berritze lanek eragin dute tabernaren itxiera, aspaldi iragarri zen moduan.

Iñigo Garitano Gizarte Ongizate teknikari buruak adierazi duenez, Udala aspalditik ibili da tabernaren arazoari irtenbide bat eman guran, baina "kostu altua eta zailtasun asko" duenez, "erremedio bakarra" erretiratuak aldi batez taberna zerbitzu barik uztea da.
Era berean, Garitanok gogorarazi du San Andres auzoan eraikiko den Abaroa berrian "Udalak inbertsio handia" egin duela. Bestalde, Garitanok jakinarazi du erretiratuen batzordearen jarrera "oso ona" izan dela. Izan ere, dio Garitanok, "gustukoa ez den erabaki bat izan arren, orokorrean oso ondo erantzun dute".
gainontzekoa ukitu barik
Tabernak hartzen duen eremua izango da obrek hartuko duten gune bakarra. Hau da, lanek ez dute gainerako gunea hartuko. Aipatutako eremua aprobetxatu egingo dute hitzaldi, eskulan tailer eta beste ekimenetarako. Tabernarik ez da egongo, baina edari hotz eta beroak dituzten makinak jartzekotan dabiltza.
abaroa berria, 2010 bukaeran
Etxaluze baserriak hartzen zuen orubean eraikiko dute Abaroa berria. Diseinu ikusgarria izango duen eraikina izango da, eta 2010 bukaeran amaituta egotea aurreikusita dago. Orduan erretiratuek behar den moduko egoitza –eta taberna– izango dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.