Ez izan xomorroa eta jantzi mozorroa!. Horra 2010erako Aratusteetako komisiñoak aukeratu duen leloa. Aurten ere, beraz, mozorrotzen ez dena ez da ongi etorria izango...
Azken urteetako joerari jarraituz, zapatuko –otsailak 13– festa bultzatzea da komisiñoaren helburua. Hala ere, martitzeneko jaiarekin ere bat egin dute. Herri bazkarirako txartelak duela aste bi jarri ziren salgai –18 eurotan–eta atera zituzten 750 txarteletatik 160 bat geratzen dira. Basatin eta Kajoin amaitu dira honezkero; oraindik txartelik ez duenak Iluntz eta Monte tabernetara jo beharko du.
Sari berriak
Zapatuko egitaraua iazko berdina izango da: 12:30ean pregoia Biteriko gasolineran eta txarangaz girotutako kalejira, 14:30ean herri bazkaria Uarkapen, eta bazkalostean, sari banaketa eta kalejira batukadarekin. Batukadak huts egin zuen iaz, baina aurten Arrasaten izango direla ziurtatu du komisiñoak. Amaitzeko, berbena izango da Herriko plazan, 19:30ean.
Berritasun nagusia da karroza, koadrila eta taberna onenaz gain, sari indibidualak ere egongo direla: mozorro ero eta bitxiena saritu egingo da. Bestalde, karrozak egiteko gaztetxea zabalduko da, otsailaren 1etik 13ra.