Udalak orain jasoko duen dirulaguntza gehigarri horri esker gauzatu ahal izango dute egin barik utzi duten egoitzarako larrialdi irteera. 230.000 euroko inbertsioa egingo dute.
Azken horren harira eta Udaleko Gizarte Zerbitzuen xehetasunen arabera, larrialdiko eskaileraren proiektua eginda dago eta lizitazio prozesua abiarazita. Asmoa da datorren urtean hastea obrok. "Eskailera egoitzaren kanpotik joango da; beraz, ez du eraginik izango egoitzaren funtzionamenduan".
Apirilean bukatuta
Iturbide egoitza berritzeko obrak aurtengo apirilean bukatu dituzte. Horiei esker, Arrasateko egoitzak espazio eta zerbitzu berriak irabazi ditu. Batetik, solairu bat gehitu diote, orain arte Abaroa egoitza izan dena. Bestetik, espazioari dagokionez, 98 egoiliarretik 104 egoiliarrendako lekua izatera pasa da egoitza.
Mendekotasuna dutenendako
Eta ez hori bakarrik, izan ere, Iturbide pertsona nagusi autonomoendako egin zen; hemendik aurrera, berriz, bakarrik mendekotasuna duten nagusiendako izango da, eta guztia egokitu beharra zegoen. Adibidez logela guztiak berritu dituzte, komunak, bereziki. Horrez gain, orain solairu guztiek dute jantoki eta egongela bana, horrela, solairu bakoitza independientea da funtzionamenduari dagokionez.