Joan den eguenean bukatu zen Arrasateko Udaleko oposizioetarako izena emateko epea. Eta oraindik ere korreo tradizionalez bidalitako eskaera batzuk jasotzen segitzen dute. Beraz, kontuan hartuta Interneteko eskaerak, gehi BAZera jo dutenenak edo korreoz bidalitako eskaerak, argi dago jende mordoskak emango duela izena Arrasateko azterketetarako.
Administrari edo BAZeko langile
Oraingoz kontatuta dituzten eskaeren arabera, gehienek izena eman gura dute administrari edo Biztanleen Arreta Zerbitzuko lanpostuen azterketetarako. Lanpostu horiez gainera, adibide batzuk ipintzearren, bi udaltzain, bi liburuzain laguntzaile, Ingurumen Eskolako irakaslea, ehorzlea edo peoi lanpostuak ere egonkortu gura ditu Arrasateko Udalak, funtzionario izaera emanez; esandako moduan, guztira, 18 lanpostu egonkortuko ditu, hiru barne promozioa erabilita eta gainontzekoak lehiaketa publikoa deituta.
Onartutakoak eta baztertutakoak
Udalean jasotako eskaera guztiak aztertu egin beharko dituzte orain, baldintzak betetzen dituzten edo ez ikusteko. Behin hori egin ostean, azterketetarako onartu eta baztertu dituztenen zerrendak argitaratuko dituzte. Interneten ipiniko dituzte, eta Gipuzkoako Buletinera ere bidaliko dituzte. Horrez gainera, lehenengo azterketaren data ere finkatuko dute, baina aurreratu dute uztailean izango dela.
Azterketak Uarkapen
Azterketei dagokienez, horiek egiteko lekua ere aldatu egin beharko du Udalak. Izan ere, azterketa publiko gehienak Kulturateko aretoetan egiten dituzte, baina ikusita eskaera kopurua, azterketa asko egiteko Uarkape erabili beharko dutela pentsatzen dute.