Arrasateko Udalak, San Josepe harrobirako proposatutako proiektuak ikusgai ipiniko ditu Kulturaten, bihartik azaroaren 9ra arte.
Ezin esan, aurkeztutako proiektuak Euskal Herritik bakarrik iritsi direnik; izan ere, jaso dituzte Gipuzkoatik, Arabatik eta Bizkaitik, baina baita Espainiatik eta nazioartetik ere, hala nola, Frantzia edota Estatu Batuetatik. San Josepe ideien proiektuan laguntzaile den Naia Ruiz de Eginok egin digu berba, proiektuak sor dezakeen interesaren gainean. "Oso proiektu interesgarria da halako harrobi bati beste erabilera bat ematearena. Gainera, ordainsaria ere ederra da, izan ere, irabazleak 88.000 euro irabaziko ditu eta bigarrenak, 12.000 euro."
Bideragarritasuna irizpide
Ideien lehiaketa hori irabazteak ez du suposatuko San Josepen proiektu hori gauzatuko denik. Behin irabazlea erabakita, "bideragarritasuna aztertu beharko litzateke" dio Ruiz de Eginok. "Zonaldea aztertu eta proiektua orografiara, herriko beharretara edota ingurunera egokitzen den aztertu beharko litzateke, eta nola ez, bideragarritasun ekonomikoa ere ikusi beharko litzateke." Dena den, epaimahaiak finalistak eta irabazlea aukeratzerako orduan, garrantzia handia emango dio horri, hots, bideragarritasunari."
Herritarren parte hartzea
Herritarrek ere izango dute zeresana lehiaketako finalistak aukeratzerakoan. Izan ere, finalera pasatuko diren bost proiektuetatik bat izango da herriak aukeratutakoa. Hala, erakusketak irauten duen bitartean, Arrasaten erroldatutako 16 urtetik gorakoek, euren botoa emateko aukera izango dute.
Ideien lehiaketako epaimahaia, 19 lagunek osatuko dute; udaletxeko ordezkariek, proiektuaren sustatzaileek edota arkitektoek, beste batzuen artean. Euren erabakia, 2009an jakingo da.