Nafarroa etorbidetik irten, Mondragon Hotel ingurutik pasa, Biteri zeharkatu, Maala bisitatu eta Garibai etorbidetik pasa ostean, Herriko Plazan 21:00etan egingo dute ekitaldi nagusia aurtengo Haur Danborradan jardungo duten neska-mutikoek. 250 neska-mutiko, guztira.
Diana, Donostiako Martxa, Tatiago… moduko doinu tradizionalen erritmora jardungo dute 3-4 urtetik gorako gaztetxoek, eta "akaso San Juan ere joko dute", kontatu du Juan Luis Arkauzek, danborrada antolatzen duen SUDC elkarteko ordezkariak.
Pilotalekua
Horrez gainera, hark kontatu du karroza eta guzti aterako direla Haurren Danborradakoak, pilotalekua irudikatzen duen karrozarekin, "herriko pilotariei omenaldia egin guran". 25 bat neska-mutiko joango dira karroza horretan.
Gainera, karrozaren bitartez ez dituzte kontuan hartuko bakarrik oraingo pilotari gazteak, izan ere, ikusgai ipiniko dituzte pilotarekin lotutako Arrasateko izen handien argazki zaharrak, Pilotari
liburutik ateratakoak.