Hain justu, martitzenean prentsaurrekoa egin zuen herritar talde batek jakinarazteko Arrasatetik 25 lagun joango direla presoen alde korrika egitera. Eta horrekin batera, inguruko herrikideak animatu zituzten gauza bera egitera.
Horrez gain, "kezka" azaldu zuten presoen egoeraren aurrean. Salatu zuten 12 preso daudela kartzelan gaixotasun sendaezinak izan arren, eta tartean daudela Josu Uribetxeberria eta Jon Agirre arrasatearrak. Salatu zuten, baita ere, bizi osorako zigorra ezartzen zaiela euskal presoei, "auzitegi nazionalak asmatutako doktrina baten bitartez", eta horien artean daudela Jose Inazio Gaztañaga eta Luis Mari Azkargorta arrasatearrak. Unai Parot eta haren moduan beste 46 preso bakartuta daudela ere gogora ekarri zuten. Eta PSOE eta PPren nahia presoak "kartzeletan hiltzea edo usteltzea" dela salatu zuten.
Ostean, eskatu zuten gaixoen eta zigorra beteta dutenen "berehalako etxeratzea". Jakinarazi zuten presoen eskubideen inguruan herri dinamika iraunkorrak antolatuko dituztela, eta herritarrak animatu dituzte halakoetan parte hartzera.