Atzo, domeka, 22:00ak aldera, hasi zituzten bilaketa lanak Udalatxen, familiak desagerpenaren berri eman bezain pronto. Larrialdi kasuetarako Eusko Jaurlaritzako teknikari batek zuzendu zuen operazioa eta bilaketa lanetan jardun zuten ertzainek, Arrasateko espeleologia taldeko kideek eta biktimaren lagunek ere.
19 urteko gaztea bakarrik joan zen mendira eta, Ertzaintzaren prentsa oharrean jasotzen denez, erorketa baten ostean jasandako zaurien ondorioz hil zen. Donostiako Patologia Forentsera eraman dute gorpua.
Espeleologia, afizio
2009ko ekainaren 12ko Goienkaria-n elkarrizketa egin genion Josebari. Espeleologiaren gainean hauxe kontatu zigun:
Noiz eta nola hasi zinen egiten espeleologian?
Orain dela bost urte-edo. Lagun batzuekin batera eskalada ezagutzen
hasi nintzen, eta, oso gustuko nuenez, aitaren eta haren lagun batzuen
bitartez kobazuloetako mundua ezagutzeko aukera izan nuen. Gainera,
kobazuloak ondo ezagutzeko kuriositate handia neukan, gurasoek txikitan
eroan izan naute-eta.
Aitak eta haren lagunek erabat asmatu zuten, hortaz.
Zalantza barik. Orain, espeleologia droga hutsa da niretzako.
Kobazuloa beste mundu bat da, bertan nagoenean ahaztu egiten naiz
kanpoko guztiaz eta bertan gertatzen denaz. Mundu berri baten sartzen
naiz, eta izugarri gustatzen zait: txoko berriak bilatu, bertan
arnasten den lasaitasuna... Asko dira iluntasunean eta leku estuetan
estresatzen direnak. Niri, ordea, horrek guztiak lasaitu egiten nau.
Kobazuloetan sartzen garenean lehenengo pausoa lekua aztertzea da,
txoko berriak bilatzea eta gunea zein den zehaztea, hain zuzen. Gero,
plano batzuk egiten ditugu, eta baita bertako fauna eta geologia ikertu
ere. Azkenik, deskribapena, planoak eta argazkiak gure datu basean
sartzen ditugu. Kide gutxi gara Arrasateko taldean eta oñatiarrekin
batera joaten gara.