Garagartzako ortu ekologikoen zozketaren prozesua aurrera doa. Zozketarako aurkeztu ziren 197 lagunetatik 20 baztertu ditu Udalak, baldintzak betetzen ez dituztelako. Hala, 177 lagun dira zozketan parte hartuko dutenak, gizonak gehienak: 128. Zerrendak kontsulta daitezke BAZen, Udalaren web orrian (arrasate-mondragon.org) eta udaletxe azpiko iragarki-taulan.
Hain justu, Udalaren erabakiarekin konforme ez daudenek 10 eguneko epea dute alegazioak aurkezteko.
Erretiratu gutxi
Deigarria dena da erretiratu gutxi aurkeztu dela ortuotako bat eskuratzeko, nahiz eta herritar askok pentsatu erretiratuendako ortuak direla Garagartzakoak. Adibidez, 71 urtetik gorako bostek eman dute izena eta 61-70 urte bitarteko 24 lagunek. Ugarienak, berriz, 51-60 urtekoak dira: 48 lagun.
Zozketa irailean
Ortuen zozketa irailaren lehen hamabostaldian egingo dute. Eta behin ortuak zozketatuta, urriaren hasieran egingo dute behin betiko adjudikazioa.
87 ortu ekologiko egokitu dituzte Garagartzan (Fagor ondoan) eta horietatik 80 zozketatuko ditu Udalak. Gainerako 7ak bere erabilerarako gordeko ditu. Ortu horiek 50 eta 70 metro karratu arteko azalera dute. Zozketan ortua eskuratzen duenak asko jota 20 urtean erabili ahal izango du.