Eva Segovia Felguerosok gaur hartu du zinegotzi kargua. Gasteizen jaiotakoa da, 33 urte ditu eta Zuzenbide ikasketekin borrokan dabilela kontatu digu. Berez, salmenten sustatzaile bat gestionatzen duela jakinarazi digu, promozioak, zentro komertzialetan stand-ak eta horrelakoak antolatuz; eta gauez, zaindari lanak ere egiten dituela.
Arrasate ezaguna
Arrasate gaztetatik ezagutzen du. Bere aitak Eskoriatzan eta Arrasaten jakiekin lotutako denda bana izan zituen-eta. Hala, laguntzera etortzen zitzaion noizean behin.
Esan digu, gainera, gustatuko litzaiokeela Arrasaten denda txiki bat zabaltzea etorkizunean.
Oraingoz, baina, Arrasaten jardungo du zinegotzi moduan, printzipioz legegintzaldia bukatu arte, eta bere hitzetan, alderdiak nahi badu, aurrera jarraitzeko ilusioarekin.
Emakumeen boto eskubidea
Bestelakoen artean, berriz, PSE-EEk mozio bat aurkeztu du gogoraraziz aurten 75 urte bete direla emakumeek botoa emateko eskubidea dutela. Hori gogorarazteko Arrasateko Udalean zenbait ekitaldi egitea proposatu du, besteak beste. Mozioa onartu egin dute, Aralarren abstentzioarekin.
Eta gainerako puntuen artean, nabarmendu behar da, bat izan ezik, gainerakoak aho batez onartu dituztela. Hori horrela, esan genezake aspaldiko partez pleno lasaia izan dugula gaurkoa.
Alkatearen dimisioa
Hori bai, bukatu baino lehen, Itziar Lamarainek, PPko ordezkariak azkenaldian ohikoa duen moduan, Inazio Lakuntza alkateari eskatu dio dimititzeko, bere hitzetan, besteak beste, Arrasaterendako eta arrasatearrendako mesedegarria izango litzatekeelako.