Juan Jose Ugarte eraberritze proiektuaren ardura izan duen arkitektua izan zen Arrasateko agintarien gida kultura etxera egindako bisitan. Oraindik ere hutsik dauden geletan barna ibili ziren, esparru bakoitza zertarako erabiliko den jakinaz, eta proiektuaren puntu garrantzitsuenak ezagutuaz.
Bisita bukatzean, alderdi politiko ezberdinetako ordezkarien iritziak bat zetozen; lanek merezi izan dutela esan zuten guztiek.
Hasiera baten aurreikusitako aurrekontuaren eta bukaerakoaren arteko aldea da begi txarrez ikusten duten puntuetako bat.
Arrasateko alkateak, lanak burutu bitartean agertutako ezusteko arazoei egotzi die aurrekontuaren igoera. Eta behin proiektua guztiz bukatuta dagoenean, kontu ikuskaritza edo auditoria bat ere agindu du dena lege barruan egin dela erakusteko.
Bisita gidatuak
Gaur agintarien txanda izan bada, bihartik aurrera hiritar orok izango du kultura etxe berria ezagutzeko aukera, taldeka edota bakarka, eta Arantzazu Otaduy historialaria gida izango dutela. Horretarako, hori bai, Biztanleen Arreta Zerbitzuan eman beharko dute izena interesatuek.