Goienkarian batutako azken datuen arabera, (eguaztenean), 60 salaketa zeuden ipinita: "Gehienak dira automobiletan eragindako kalteen gaineko salaketak; teilatuetan eragindako kalteengatik ere izan dira batzuk eta baita establezimenduetan eragindako kalteengatik ere", hala adierazi digute ertzain-etxeko argiketa sailetik. Zera ere gaineratu digute. "Salaketa gehienak joan den astean jaso genituen; oraingoan, gutxi batzuk gehiago jaso ditugu".
Bestalde, azaldu digutenez, salaketa ipini eta berehala atestatua zabaltzen dute eta hori guztia Bergarako epaitegira bidaltzen dute gero. Hortik aurrera, istripu gehienetan gertatzen den moduan, aseguru etxeak arduratuko dira kalte-ordainak emateaz, perituek egindako azterketaren ostean.
Lasaitasun mezua
Horren harira, AP1 autobidearen ardura duen Bidegik lasaitasun mezua helarazi gura diete kalteren bat jasan zutenei: "Kalteren bat izan dutenen artean, inor ez da kobratu barik geratuko, denetariko aseguruak ditugu-eta; beraz, lasai egon daitezela. Bestalde, nabarmendu beharra dago istripu hori oso ezohiko gertaera dela; hau da, oso-oso gutxitan gertatzen direla halakoak", adierazi du Bidegiko bozeramaile Oskar Recaldek. Kalte ordainak noiz kobratuko dituzten, berriz, ezin izan digu zehaztu, "hori aseguruen esku egoten da-eta".
Batzar orokorretara
Horrez gainera, jakinarazi digu istripuaren gaineko argibideak ematera joango direla Bidegikoak Batzar Orokorretara "logikoa den moduan, legebiltzarkideei esplikatu behar diegu gertatutakoa. Laster izango da hori, aste bi barru-edo".