Jon Agirreren aldeko herri ekimenekoek agerraldia egin zuten atzo, martitzena, Arrasaten. Haren osasun egoeraz kezkatuta, 92. artikulua aplikatuta aske utz dezatela eskatu zuten.
Ezetza 92. artikuluari
Joan den uztailean egin zuen Jon Agirrek eskaera 92. artikulua aplika ziezaioten, Espainiako Auzitegi Nazionaleko Zaintza Epaitegian. Ezetz erantzun diote. Atzoko agerraldian esan zutenez epaileak erabili dituen argudioak hauek izan dira:
- 92. artikulua aplikatu ahal izateko presoak hirugarren graduan egon behar duela, eta Agirre lehenengoan dagoela.
- Espetxeko medikuek ez dutela inolako txostenik egin. Baina
Hala ere, autoak gero dio Agirre lehen graduan sailkatuta egon arren, osasun arazoak medio, bertan behera geratu dela lehen gradua.
Kontraesan horiek salatu zituen atzoko agerraldian Ramon Urrizalkik herri ekimenaren izenean.
Ordezkaritza zabala
Herri ekimeneko kide eta Agirreren senideez gain, ordezkaritza zabala izan zen agerraldian. Mertxe Mondragon Aramaioko alkatea eta Ignacio Lakuntza Arrasatekoa egon ziren, EAJ, Batasuna, EA, EB-Berdeak, Aralar, Herri Anitza, EAE-ANV eta Zutikeko ordezkari politikoekin batera.
ELA, LAB, CCOO, EHNE eta ESK sindikatuetako ordezkariak ere izan ziren, beste hainbat talderekin batera: Segi, Ikasle Abertzaleak, Gazte Asanbladak, Kooperatibetako Presoen Aldeko Plataformak, Etxerat, Maritxu Kajoi Batzordea eta hainbat kirol talde.
Manifestazioa zapatuan
Jon Agirreren aldeko herri ekimenekoek manifestaziorako deia egin dute datorren zapaturako, hilaren 17rako. 19:00etan aterako da manifestazioa, udaletxeko plazatik.