Akordeoi-jotzaileen maila ona eta parte-hartze kopuru altua azpimarratu dituzte antolakuntzatik. Besteak beste, Murtzia, Teruel, Madril, Finlandia, Serbia edo Txinatik etorritakoek esku hartu dute lehiaketetan. Arrasaten igaro dituzte 5 egun, elkarrekin urduritasunezko uneak bizi izan dituzte eta ahaztuko ez dituzten oroitzapenak eraman dituzte guretik.
Sarituak
Arrasate Hiria Nazioarteko XIII. Lehiaketa Vladimir Tchernyck errusiarrak irabazi du. Bigarren postuan sailkatu da Finlandiako Heidi Lousujarvi; eta hirugarrenean, Euskal Herriko Arantzazu Agirre.
Euskal Herriko Philippe De Ezcurrak, bere aldetik, entzuleen kutxa saria bereganatu du.
Gainontzeko sarituak
Haurren maila
Gipuzkoako lehiaketan, haurren mailan, Hondarribiko Jon Iturralde izan da onena. Bigarren eta hirugarren postuetan Murtziako Narciso Jimenez eta Maria Jose Vera sailkatu dira, hurrenez hurren.
Junior maila
Junior mailan, Aretxabaletako Unai Mendikutek eskuratu du lehen saria. Bigarrena Teruelgo Juan Cazcarrak; eta hirugarrena Leioako Mikel Garciak.
Senior maila
Senior mailan, Hondarribiako Marina Mendizabal izan da onena; bigarren onena, Bera de Bidasoako Leire Telletxea; eta hirugarren postuan sailkatu da Olatz Ugarte zornotzarra.
Orkestra onena
Akordeoi orkestren goi mailako lehiaketan, Aretxabaletakoa aurkeztu da soilik. Hala ere, berak eskuratu du saria, izan ere, beharrezko puntuak lortu baititu.
Hauspoz elkartetik baikor begiratzen diote akordeoiaren etorkizunari, asko dira instrumentu hau jotzen ikastera animatzen direnak.