Arrasateko Udalak bi urte barrurako Artxiboko agiriak berreskuratuta izan nahi ditu. Gogoratu 2004an udaletxeko beheko solairuan gertatu ziren uriolen ondorioz, Arrasateko Udal Artxiboko agiri eta liburu zahar ugari kaltetu zituela urak. Horietako gehienak uriola edo uholdea gertatu eta hurrengo asteetan berreskuratu zituzten, baina bazeuden beste batzuk, kalte handia zutelako eta balio handikoak zirelako, izoztu egin zituztenak. Horiek geroago, lasaiago eta beste prozesu baten bitartez berreskuratzeko asmotan izoztu zituzten.
Lehiaketa publikoa
Orain Arrasateko Udalak izoztuta dauden horiek berreskuratu nahi ditu eta horretarako lehiaketa publikoa zabalduko du. Enpresa espezializatua kontratatu nahi du, enpresa horrek gehienez bi urteren buruan berreskuratze lana amaitu dezan. Horretarako, Udalak 300 mila euro bideratuko ditu. Hala ere, diru kopuru hori Udalak hasiera batean jarri duena da, baina gero, enpresarekin negoziatuta hobe dezakeela adierazi du.
Udalak zehaztuta du zein den berreskuratu behar den materialaren zerrenda, baina horretaz gainera, berriro aztertu beharko da dagoeneko berreskuratu den materialaren artean, ea agiririk bat dagoen berriro tratamentua behar duenik.