Arrasateko Sexologia Zerbitzuak webgunea du urte berriaz geroztik. Horren helburua da, arduradunen esanetan, zerbitzu hau erabiltzaileei beste modu batera helaraztea. Webguneak bost atal ditu, eta horietako batzuetan, erabiltzaileek parte hartzeko aukera dute. Kontsulten atalean, adibidez, formulario bat beteta, galderak, iradokizunak bidaltzeko aukera dago, izena emanda edo modu anonimoan. Horrez gain, zerbitzuak intereseko artikuluak eta berriak ipiniko ditu webgunean, eta horiei komentarioak bidaltzeko aukera ere badago. Zerbitzuko arduradunek diotenez, lehen e-postaz jasotzen genituen galderak-eta, orain webgunearen bidez bidaltzeko aukera ere izango da.
Eredu zorrotzekin apurtzea
Bigarren berritasun nagusia da Zein da zure erotika? izeneko kanpaina. Webgunean ere ematen dute horren berri. Gizartean eredu zorrotzak daude, eta hor sartzen ez den guztia disfuntzioa dela sinistarazten digute. Kanpaina honekin erakutsi nahi dugu hori ez dela horrela, diote arduradunek. Kanpaina honen barne, esku-orriak banatuko dituzte, eta sexologo batek hitzaldi bat egingo du otsailean.