Enpresaren inplikazioa gizartearen garapenean, Erantzukizun Soziala eta puri-purian dauden horrelako gaiak jorratuko ditu Marinak bere hitzaldian.
Jose Antonio Marinak (Toledo, 1939) adimena aztertzera bideratu du bere ikerketa-lana eta, batez ere, artea, zientzia, teknologia eta ekonomiaren arloko sorkuntza-mekanismoak aztertu ditu. Ética para naúfragos (1995) liburuan esaten du etika dela bizitzeko modurik adimentsuena eta bere azken liburuan, La creación económica, teoria ekonomiko nagusiak erantzukizun sozial korporatiboaren ikuspuntutik aztertzen ditu. Sari ugari jaso ditu Marinak.
Arizmendi Topaketak, XVIII. edizioa
Arizmendi Topaketak, Gizabidea Fundazioak antolatzen ditu urtero; aurtengoa XVIII. edizioa izango da. Urtero-urtero itzal handiko hizlariak izaten dira Arizmendi Topaketetan. Iazko edizioan Félix Martík, UNESCOko kide eta filosofia irakasleak, Iraultza Baketsuak XXI. menderako gaiaz jardun zuen. 2003an, Le Monde Diplomatique-ko zuzendariak, Ignacio Ramonet pentsalariak, Globalizazio liberala eta gizarte-erreakzioa gaiari heldu zion.
Gizabide Fundazioa On Jose Maria Arizmendiarrietaren azken ekimena izan zen. Bere eginkizuna hezkuntza sustatzea da, pixkanaka eraldaketa sozio-ekonomikoa lortzeko, betiere komunitatearen premien eta ahalbideen bilakaerarekin bat etorriz.