Atzerapenak atzerapen, beharginek eman dituzte Garaia Berrikuntza Gunea errealitate bihurtzeko lehen urratsak. Abuztu hasieran ekin zioten lanari: pinuak bota eta lurrak mugitu dituzte.
Errepide ondoko Gautxoriko etxeak ere opor hilabete horretan eraistea zen asmoa, baina argi indar kableak eta etxepetik pasatzen den ubidea tarteko, ez da oraingoz halakorik egitea posible izan. Arazook konponduta, etxeak hilabete honetan bertan botatzeko itxaropena azaldu du Andoni Gartzia, Garaiako gerenteak. Gautxori ondoko Urra etxea urte terdiren buruan eraitsiko dute. Emi eta Errasti lantegiak lekuz aldatuko dira; Markuleteko industrialdera pasako dira urte bukaeran. Atxa lantegia, aldiz, desagertu egingo da urte batzuk barru.
Lehen fasea
Lurjabeen eta Garaiako kideen arteko negoziaketak zabalik dauden arren, Berrikuntza Gunekoek lanak hasteko baimena lortu dute premiazko okupazio deritzonaren bitartez. Lehendabiziko fasea da abian jarri dutena: hamazortzi hilabetean, gune osoko azpiegiturak instalatuko dituzte, eta 10 mila metro koadroko eraikin bat jasoko dute, lehen proiektuak martxan jarri ahal izateko. Fasearen aurrekontua bost milioi euro terdikoa da.
Bigarren fasea
Dena ondo badoa, bigarren faseari helduko diote 20-22 hilabete barru, eta aldi horretan errepideak bukatu eta egun existitzen ez diren zelaiguneak egingo dituzte, zazpi-zortzi milioi euro inguruko aurrekontuarekin. 2008 urtean Garaiari nortasuna emango dion eraikin erraldoi bat altxatuko dute.
Hirugarren fasea
Hirugarren fasean, Berrikuntza Gunean lanean ariko direnentzat kirol ekipamenduak eta jantokia aurreikusten dira, eta baita Garagartzatik Eroski merkatal gunera oinez joatea ahalbidetuko duen pasealekua ere. Era berean, unibertsitateko hirugarren eta laugarren mailako ikasleentzat eta kanpotik datozen ikertzaile eta zientzialarientzat egoitza bat eraikiko dute, eta Berrikuntza Gune ondoko etxebizitzen lokalak erosiko dituzte poloko proiektuen osagarri izan daitezkeen enpresentzat. Guzti hori, hemendik hamabost bat urtera Garaian 1200 bat lagun lanean ariko diren itxaropenarekin.