Euria egingo ote zuen beldur ziren, baina ateri mantendu zen danborradak iraun zuen bitartean. 175 bat neska-mutikok hartu zuten parte, eta urtero egiten duten ibilbidea bete zuten: Nafarroa etorbidean hasi, eta Garibai, Maala eta Erdiko kalea zeharkatuta Herriko plazara iritsi ziren.
Danborradaren buruan jenerala zihoan, zaldi gainean eta dotore jantzita. Bere ondoren banderadun neskak, hauek ere zaldi gainean. Atzetik, zazpi konpainiatan banatuta zihoazen neska-mutikoak. Kupeldunak ziren ugarienak eta bi taldetan banaturik zeharkatu zituzten Arrasateko kaleak: neskak alde batetik eta mutilak bestetik. Arrasate Musikaleko Bandak jotzen zuen musikaren erritmora astindu zituzten danborrak. Txikienak karrozan eraman zituzten, baserritar jantzita.
Plazan emanaldia
Ikusleak kale guztietan izan zituzten zain danborrariek. Plaza ere beteta zegoen eurak iritsi baino ordu erdi lehenago. Zaldiak eta karroza kanpoan utzita sartu ziren plazan. Jeneralak eta banderadunek bira bat eman zioten eta udaletxeko balkoira igo ziren. Danborrariek eta bandak Tatiago, Donostiako martxa, Gora Arrasate, Udalpe jo zituzten, eta San Juanetako ereserkiarekin eman zioten amaiera danborradari.