Aretxabaletako Udalak Lausita auzoko Hornidura eta Saneamendu Plan Bereziaren proiektua idazteko espedienteari hasiera eman dio. Esku-hartzeak auzo osoa hartuko du, 16.000 metro koadro inguruko eremua, eta bertako saneamendu eta hornidura sareak erabat berritzea dute helburu. Azpiegitura horiekin batera, kaleak eta espaloiak ere konponduko dituzte. Udalak proiektuaren idazketa aurten lizitatzeko asmoa du, eta lan horien kostua 100.000 eurotik gorakoa izango da. Aurreikuspenen arabera, agintaldia amaitu aurretik proiektua idatzita egongo da, hurrengo agintaldian obrak hasi ahal izateko.
Urgentziazko konponketa
Azken hilabetean, urgentziazko esku-hartzea egin dute Lausitako 2-12 atarietan, ur horniduran zegoen arazoari irtenbidea emateko. Egindako konponketarekin, etxebizitza horietako ur hornidura bermatuta geratu da eta zegoen arazoa konpondu dute. Euri uren saneamendua egitea eta gainerako atarietako instalazio guztiak berritu behar dituztela ere adierazi dute Udaletik. Behar horiei guztiei modu bateratuan erantzuteko idatziko dute Hornidura eta Saneamendu Plan Bereziaren proiektua.