Harrijasotzaileak eta aizkolariak izan dira eguerdiko protagonistak. Olaia Esnaolak eta Sara Asenjok eman diote hasiera saioari, harriak altxatzen. Ondoren, Aratz Mugerza eta Arkaitz Etxebeste aizkolariek hartu dute lekukoa, enborrak moztuz. Jarraian, Jon Unanue harri-jasotzaileak 200 kiloko harria altxatu du, ikusleen arreta bereganatuz.
Erakustaldiko une nagusietako bat binakako proba izan da. Alde batean, Sara Asenjo eta Aratz Mugerza aritu dira; bestean, berriz, Olaia Esnaola eta Arkaitz Etxebeste. Bi bikoteek txandaka osatu dute proba.
Lehenik, harri-jasotzaileek bost aldiz altxatu behar izan dute harria. Ondoren, bikoteko aizkolariak enbor bat moztu du, eta berriro ere hasierako ziklora itzuli dira; sei enbor moztu arte. Proba horren ostean, trontzan egin dute, lau zati moztu ditu bikote bakoitzak eta azken zatian 12 buelta eman dizkiote plazari. Amaieran, Aratz Mugerza eta Arkaitz Etxebeste batera iritsi dira helmugara.
