Aretxabaletako Udalak lizitaziora aterako ditu Iralabarriko eta Kurtzebarriko haur parkeak berritzeko lanak. Bi guneetako lanek 75.854 euroko aurrekontua izango dute, eta lau hilabeteko epea izango du esleipendunak. Iralabarriko plazako haur txikien parkean egingo dute berritze lanik handiena. Udalak jakinarazi duenez, gaur egun dauden jolas elementu gehienak kendu eta berriak jarriko dituzte. Era berean, parkeko lurra ere berrituko dute, jolasgunea osorik egokitzeko lanen barruan. Kurtzebarri parkean, berriz, ingurua txukundu, lurra zein bankuak aldatu eta biraka ibiltzeko jolas irisgarri berri bat ere jarriko dute.
Mantentze-lanak
Bi parke horiek berritzearekin batera, herriko gainerako haur parkeak ere egokitzeko asmoa du Udalak. Gernika plazako jolasgunean esku-hartze handia egitea aurreikusi dute. Gainerako parkeetan ere egingo dituzte beharrezko lanak, bakoitzaren egoeraren arabera, sortzen diren beharrei erantzuteko helburuarekin. Horretarako, enpresa bat kontratatuko dute, herriko haur parkeetan etengabeko egokitzapen eta mantentze-lanak egiteko.