Hainbat eragilerekin eta herritarrekin elkarlanean, eta, Elhuyar Aholkularitzak bideratuta, landu zuen euskara biziberritzeko Aroa plana Aretxabaletako Udalak 2025ean. Prozesu hartan jasotako proposamenekin plan estrategikoa osatu dute, eta joan den eguaztenean egindako ohiko osoko bilkuran onartu zuen udalbatzak. Hamar urterako plana izango da eta Udalaren webgunean dute dokumentua eskura herritarrek.
Talde autonomoak lanean
Behin lanketa prozesua bukatuta, Beinke izena jarri dioten Herriko Euskararen Mahaia osatu dute Aretxabaletako Udalak, Loramendi Euskara Elkarteak eta lanketa hartan parte hartu zuten zenbait herritarrek. Mahai horren helburua da prozesuan adostutako erronkak koordinatzea eta antolatzea, lehenetsi ziren puntuetatik abiatuta.
Gaikako lantalde autonomoak sortu dira ondoren, "era eraginkorrean" antolatzeko, eta lanean dabiltza. Horien artean daude kirola eta euskara taldea, adinekoen artean euskara sustatzeko eragileak, merkatariekin diharduen Euskara Laguna boluntario sarea, euskal kulturaren berreskuratzea helburu duen taldea eta hezkuntza taldea.