Ekimen horrek udalerriko baserrien kudeaketa erraztea du helburu, eta Gipuzkoako Foru Aldundiaren dirulaguntza jaso du. Aretxabaletako landa-lurren zatien mugak ez daudela behar bezala eguneratuta katastroan adierazi dute Udaletik: "Lur horien titularren batezbesteko adina altua da, eta belaunaldien arteko erreleboa eskasa. Horrek partzela-mugei buruzko ezagutza galtzea ekarri du, eta, ondorioz, maiz sortzen dira akatsak eta zailtasunak lur sail horiekin lotutako edozein tramitetan". Horregatik, guztiz beharrezkoa dela lur zatien definizio kartografikoa eguneratzea gaineratu dute, "finka horiek kudeatzen jarraitu ahal izateko".
Uztailean lizitatu, udazkenean lanak
Lanen helburua da mugakideen arteko akordioaren eta altxatze topografikoaren bidez 04 eta 05 poligonoetako landa lur-zatiak mugatzea, Gipuzkoako Foru Aldundiko Katastro Zerbitzuan informazioa eguneratzeko. Horretarako lizitazioa uztailaren erdialdean abiatuko du Udalak eta lanak udazkenean hastea aurreikusi dute.