San Kristobal jaiak ari dira ospatzen Aretxabaletako Larrino auzoan. Urtero moduan, autoen bedeinkapen errituala egin zuten egubakoitz iluntzean eta ondoren, aitortza egin dotoreen apaindutakoari. Auzo alkatearen, David Agirreren, eskutik jaso du sari hori Ander Arietaleanizbeaskoak.
Jabier Zubizarreta apaizak bedeinkatu zituen eliza ondora gerturatu zituzten ibilgailuak, bertako elizan meza eman ondoren. Bedeinkazioen ostean luntxaz gozatu zuten hara joandako auzotarrek. Gaur, nagusien bola-joko txapelketan elkartuko dira asko berriz, 17:00etan. Baita goizean egingo den Larrinoko II. pilota txapelketan eta eguerdiko dantzaldian eta bazkarian ere. 19:00etan, erromeria egongo da Imanol Intxausti eta Iñaki Larrañaga trikitilariekin.