Etzi, Udaberriko Jaixek hogeigarren aldiz elkartuko dute Arizmendi Ikastolako hezkuntza komunitate osoa, Aretxabaletan. Ikastolako guraso, ikasle eta irakasleek negua atzean geratu dela ospatu eta umorez eta alaitasunez egingo diote ongietorria udaberriari.
Egun osoko festa
Antolatzaileek azaldu dutenez, egun osoko festa izatea da Udaberriko Jaixen asmoa, eta, horretarako, "ilusio eta gogo handiz", egitarau bat prestatzen ibili dira,"adin guztietako herritarrei zuzendutako" ekintzak jasotzen dituena.
10:30ean hasiko dute eguna, Basabeazpi gunearen kanpoaldean, eta jolasak egiten ibiliko dira bertan. 12:00etan Basabeazpi atzean utzi, eta "jai giroak herriko erdigunera egingo du jauzi", trikitilariek girotutako kalejirarekin. Plazara heltzean, 12:30ean, dantzak izango dira, eta 13:00etan buruhandien txanda izango da. 13:30ean, trikiti soinuak nagusituko dira berriro, eta 14:30ean herri bazkari hasiko da.
15:00etan, umeentzako tailerrak izango dira, eta 16:15ean, musika eta dantzak. Eguna modu borobilean amaitzeko, 17:30ean, txokolate beroa banatuko dute, eta bertan izango da Argitxo.