Txapelketari martxoaren 7an ekin zioten Elgoibarren eta zapatuetan jokatzen dute; apirilaren 11koa laugarren tiraldia izango da eta 17:00etan elkartuko dira bolatokian. UDA Hirutxirlo taldearekin batera beste honako hauek dihardute nor baino nor gehiago txapelketan: Elgoibarko San Migel, Elgeta, Lastur, Soraluzeko Ezozi eta San Andres, Bergarako San Joxepe, Azkoitiko Floreaga eta Eibarko Asola-Berri.
Sailkapenari dagokionez UDAko Gorka Madinabeitia doa buru, 19 punturekin 7 bola sartuta; haren atzetik dago Eibarko Enara Montiel 18 punturekin. Eta bikoteka, bigarren postuan daude Madinabeitia eta Eñaut Kortabarria.
Egubakoitz gauetan ere bai
Txapelketa hori jokatu bitartean beste bati ere ekin diote. Egubakoitzetan jokatzen dute hori, 23:00etan, hurrengo egunean Hiru Txirlo tiraldiak izango diren bolatokietako batzuetan. Aretxabaletakoa ere batu da zirkuitu horretara eta apirilaren 10ean izango da tiraldia.
