Lau gunetan egingo dituzte esku-hartzeak. "Birlandaketa plana irizpide tekniko eta ingurumen-irizpide desberdinak kontuan hartuta prestatu da, betiere arloko adituekin kontrastatuta", adierazi dute Udaletik. Hala, gune bakoitzaren ezaugarriak aztertu dituzte –espazio erabilgarria, etxebizitzekiko distantzia eta lurzoruaren baldintzak–, kokaleku bakoitzerako "espezie egokiena" hautatzeko.
Hainbat zuhaitz mota
Lau gune hautatu dituzte. Santa Kurtz kalearen hasieratik pilotalekuraino, Liquidambar espezieko zuhaitzak landatuko dira: "Espezie horrek egitura sendoa eta udazkeneko kolore ikusgarria eskaintzen ditu". Dena den, etxebizitzetatik hurbilen dauden tarteetan tamaina kontrolatuagoa duen barietatea landatuko dute: Liquidambar Gumball, porte txikiagokoa da eta espazio murritzetan egokiagoa.
Errekabarren kalean, platanondo batzuk birlandatuko dituzte: "Lerrokadura berreskuratu eta itzal-jarraikortasuna bermatzeko. Zuhaitz horiek etorkizunean modu planifikatuan inausteko asmoa dago, hazkundea kontrolatzeko eta segurtasuna indartzeko".
Geltoki plazan, ezkiak ordezkatuko dituzte; eta herriko beste hainbat gunetan egoera txarrean dauden zuhaitzak ere berrituko dira.
Herriko Plazan lehortuta dagoen artea moztu egingo dute: "Datorren neguan arbolen birlandaketa eta eremu hori txukuntzeko obra txiki bat ere egitea aurreikusten da".
Egunotan egingo dituzte esandako lanok eta Udaletik adierazi dute obrak egin bitartean, une jakinetan, oinezkoen edo ibilgailuen joan-etorrian aldaketak egon daitezkeela.