Ekoudalatx-ek Sendabelarrak ezagutzen ikastaroa emango du, sendabelarren inguruko ezagutza zabaltzeko helburuarekin. Ikastaroan zehar, parte-hartzaileek inguruko sendabelarrak ezagutuko dituzte, haien ezaugarriak eta erabilerak aztertuz. Landuko dute baita biltzeko garai egokia, erabiltzen diren landare-atalei buruzko informazioa, lehortze prozesua eta kontserbazio moduak ere.
Saioak teoriko-praktikoak izango dira, eta prestaketa sinple eta erabilgarriak egingo dituztela eman dute jakitera, hala nola beraketak, tinturak, infusioak, xarabeak, linimentuak, ukenduak eta baltsamoak.
Ikastaroa eguenetan egingo da, 17:00etatik 19:00etara; honako egunetan: martxoaren 12an eta 26an; apirilaren 16an, 23an eta 30ean; eta maiatzaren 14an, 21ean eta 28an.
Izen-ematea otsailaren 18tik martxoaren 3ra bitartean egin ahal izango da Arkupe kultur etxeko harreran. Plaza kopurua mugatua da, eta ikastaroaren prezioa 40 euro.