Operazio honekin, "indargune teknologikoak areagotzea eta negozioaren dibertsifikazio-prozesuan urrats estrategiko bat" emango dela azaldu du Mondragon Assemblyk; elikagai-packagingaren sektorera, eta, bereziki, picking eta kaxaratze lerroen fabrikaziora sartuz.
Bi enpresek, euren arduren "konbergentzia eta sinergia maila handiak" kontuan izan dituzte akordiora heltzeko orduan: "Batasun honekin, ATPk Mondragon Assemblyri elikagai-packagingaren sektorean sartzeko aukera ematen dio, sektorean esperientzia handia duen eragile baten eskutik; bezero garrantzitsuen eskutik, oso produktu teknologiko eta kalitatezkoekin, eta lantalde profesional sendoarekin", nabarmendu dute.
Bestalde, Mondragon Assemblyk ATPri egingo dizkion ekarpenen artean, honakoak azpimarratu dituzte: "Talde kontsolidatu batean parte izatea, nazioarteko sarearen bidez merkatu berrietara sarbidea, baliabideak eta finantza gaitasuna, eta lantegi zein kokapen anitzeko talde baten kudeaketa-sistemak bere egitea".
Enpresaren kapital osoa erosi dute
Erosketa honekin, Mondragon Assemblyk enpresaren kapitalaren %100 eskuratu du. Akordioa, otsailaren 19an sinatu zen Bartzelonan, eta bertan izan ziren besteak beste: Nereo Urbano, Ignasi Manresa, Manel Bernat eta Joaquin Bellido ATPko bazkideak; baita Mikel Gantxegi eta Igor Herrate, Mondragon Assemblyren zuzendari nagusia eta presidentea, hurrenez hurren.
Bestetik, erosketa prozesuan, Mondragon Assemblyk LKS Corporate & Legal-en laguntza jaso du. "Ahaleginak egingo ditugu proiektu bateratu honetan parte hartzen duten guztientzat ondare iraunkor oparoa uzteko; berrikuntzaren ikuspegitik emankorra izango den ondarea gainera", azaldu du Mondragon Assemblyren zuzendari nagusiak.