Kultura Sailak mozorro lehiaketako sariak banatu zituzten iluntzean. Guggenheim Urkulun, Euripean kantuan, Txinbolin, Egiptoko totema eta Zezen mekanikoa taldeak izan ziren sarituak; 16 urtetik beherakoen kategorian, Barbiak, Cowboyak, Simpsondarrak, Haway eta Errozioak taldeek eraman zituzten sariak.
'Fito' gogoan, UDAren eskutik
UDAko kideek omenaldia egin zioten joan den uztailean zendu zen Javier Etxeberria, Fito-ri. 63 urte zituen aretxabaletarrak, eta herrian oso ezaguna eta estimatua zen. Bi pasio handi izan zituen: UDA eta Aratusteak, taldeko kideekin batera prestatzen zuen urtero mozorroa.
Josu Aizpurua UDAko jokalariak azaldu zuenez, Fito-k "beti" antolatzen zizkien Aratusteak", eta aurten, hari eskainitako karroza prestatu dute, egindako lana eta utzitako arrastoa eskertzeko. "Eskerrak eman nahi dizkiogu egindako lanagatik, beti egongo da gure bihotzetan", azpimarratu zuen Aizpuruak.
Balorazio "positiboa"
Ibai Zangitu Kultura zinegotziaren arabera, "jaiak, orokorrean, oso ondo joan dira; desfilea ondo joan zen, karroza asko, eta eguraldiak errespetatu egin zuen". Horrez gain, garbiketa lanak nabarmendu ditu: "Txalotzekoa da kale garbitzaileen lana; herria hankaz gora gelditzen da, eta, haiei esker, azkar itzultzen da normaltasunera". Gaueko erreketa ere aipatu zuen Zangituk: "Goizaldean edukiontzi batzuen erreketa izan zen, eta horrek jaiak apur bat desitxuratu zituen, baina, oro har, balorazioa positiboa da".
Edukiontzien erreketa
Astelehen goizaldean, 01:20 inguruan, su eman zioten Ilargi plaza aurrealdeko bi edukiontziri; horren ondoren, alboan zeuden beste lau ere erre ziren. Suhiltzaileek itzali zuten sua.