Eguen gauean, Aretxabaletan herritarrak babesteko lanetan ari zen Ertzaintzaren patruila bat eta, haien esanetan, auto bat noraezean zebilen. Agenteek ibilgailua geldiarazi eta gidaria, bakarrik zihoana, identifikatu zuten. "Auto barruan marihuana-usain handia zegoen, eta atzeko aldean, kaxa baten barruan, 700 gramo marihuana-kukulu zeuden", azaldu dute. Miaketan kokaina-dosi bat eta bi labana ere aurkitu dituzte, eta konfiskatu egin dituzte.
"Ebidentzia horien aurrean", ertzainek gizona atxilotu zuten, droga-trafikoaren delitua leporatuta. Egindako droga-testean positibo eman du, eta ikertu gisa eginbideak ere ireki dizkiote, "bide-segurtasunaren aurkako delitu batengatik".
Espainiar nazionalitateko 31 urteko gizona da atxilotua, eta epailearen eskuetan jarriko dute dagozkion eginbideak amaitu ondoren.