Ohiturari eutsita, otsailaren 4an, Santa Ageda bezpera, auzorik auzo eta baserririk baserri joango dira kantuan eta eskean, eta hurrengo egunean, kalerik kale; iluntzean, 19:00etan, aurtengo lehen dantza saioa egingo dute, Herriko Plazan, eta ondoren beste bi egunetan elkartuko dira horretarako: otsailaren 8an eta 15ean. "Ohituraren nondik norako guztiak ezagutzeko eta horri dagokion moduan eusteko bilera bat izan genuen hainbat herritarrekin eta txistulari taldeko kide batzuekin", adierazi dute kintoek. Eta horretan saiatuko dira.
Abesbatza eta Basotxokoak ere bai
Kintoak ez dira izango kopla kantuan ibiliko diren bakarrak. Aretxabaleta Abesbatza ere irtengo da eguaztenean. Plazan elkartuko dira, 18:15ean, eta GSR egoitzara joango dira. Handik bueltan udaletxearen aurrealdean abestu, eta plazan bukatuko dute ibilbidea. Basotxoko abestaldeak ere egingo du kantuan, ordu berean hasita. Uretzetik abiatuko dira eta bertan bukatuko dute, mokadutxo bat janda.