Nerabeen guraso talde baten eskariari kasu eginda, guraso eskola antolatu du Udalak, seme-alaben "heziketaren inguruko hausnarketa eta elkarrizketa" sustatzeko helburuarekin: "Esperientziak partekatzeko, orientazioa jasotzeko eta nerabeen bizitza garai honetan sortzen diren erronkei elkarrekin aurre egiteko tresnak eskuratzea izango da eskolaren asmoa".
Garaia enpresako kideak arduratuko dira eskola dinamizatzeaz. Enpresa horrek "eskarmentu handia" duela adierazi dute Udaletik, Aretxabaletan bertan ere urteak daramatzalako haur eta nerabeekin prebentzio saioak bideratzen: "Bertako errealitatea ondo ezagutzen duen enpresa da".
Hilabetean behin
Saioak honako egunetan izango dira: otsailaren 3a, martxoaren 2a, apirilaren 14a, maiatzaren 5a eta ekainaren 2a.
Arkupe kultur etxean elkartuko dira 18:00tik 19:30era bitartean. Interesa dutenei lau saiotan parte hartzeko konpromisoa eskatu diete, "jarraikortasuna eta talde dinamika bermatzeko".
Izena emateko edo informazio gehiago jasotzeko, ondoko emailera idatzi edo telefono zenbakira deitu : gazteria@aretxabaleta.eus 943 711862. Horretarako azken eguna urtarrilaren 30a da.