Pausoka Haur Eskola kooperatibak haur eskola zerbitzua izan du esleituta 1990etik Aretxabaletan. Eusko Jaurlaritzaren eta Udalaren finantzaketa jaso du urteotan, gurasoen kuotekin osatuta. Baina 2025-2026ko ikasturtea izango da Jaurlaritzaren finantzaketa jasoko duen azkena; izan ere, erakunde horrek erabaki zuen 2024an Udal Haurreskolen finantzaketa etetea, Partzuergoa eskaintzeko udalei.
Herriko egoera aztertzeko mahai bat osatu zuen Udalak honako ikastetxe hauetako ordezkariekin: Pausoka Haur Eskola, Kurtzebarri Eskola eta Arizmendi Ikastola. "Bi helburu izan ditu: Pausokako hezitzaileen lanpostuak mantentzea eta herrian 0 eta 2 adin tartean eskaintza bakarra mantentzea", azaldu du Garikoitz Iturbe alkateak. Eta guztien artean adostu dute Haurreskolen Partzuergoa eskaintzea Aretxabaletan, "Udalak ezin duelako finantzaketa bere gain hartu".
Eraikina, berbera
Finantzaketa Hezkuntza Sailaren ardura izan arren, eraikina bideratzea Udalari dagokio. Pausokaren kokaleku izan den eraikina Gizabidea Fundazioarena da; 2003an sinatutako hitzarmen bati esker, 35 urteko ibilbidearen zatirik handiena han egin du haur eskolak. Arizmendi Ikastola fundazio horrek osatutako patronatuko kide da eta Udalak deitutako mahaian egon da. Hala, akordio bat lortu dute guztien artean, zerbitzuak bertan jarrai dezan: "Partzuergoaren eskaintza Gizabidearena den eraikinean izango da 2026-2027ko ikasturtetik aurrera. Eta Arizmendi Ikastolak 2 urteko gela bertan izango du". Horretarako, eraikina egokitu egingo dute, "beste espazio bat" eraikita.
Bestetik, Pausokako hezitzaileak Haurreskolen Partzuergoko lantaldean sartuko ditu Jaurlaritzak, subrogazio bidez.
Alkatea pozik dago lortutakoarekin: "Bakoitzaren interesen gainetik, herriarenak gailendu dira. Udalak, ikastetxeek eta Gizabideak ikuspegi horrekin egin dugu lan. Akordio positiboa da Aretxabaletarentzat, eta etorkizunean hezkuntzak izango dituen erronkei erantzuteko oinarria eraikitzen laguntzen duela uste dugu".