Bestalde, aurten ez da bazkari golfo-rik egingo Aretxabaletako Aratusteetan. Karnabalen Lagunak elkarteak antolatu izan du orain arte ekimena, eta abenduaren 21ean bazkaria antolatzeko egindako bilera irekiaren ostean hartu zuten erabakia. Elkarteak iaz adierazi zuenez, "gertakari batzuen" ondorioz "polizia lanetan" ibili ziren antolakuntzakoak.
Gauzak horrela, sare sozialetan adierazi dutenez, ez dute "indarrik ez gogorik frontoiko bazkaria aurrera eramateko". Dena den, Aratusteek "esangura handia" dute elkartearentzako, eta, horregatik, "haien alde" lanean jarraituko dutela esan dute, "beste toki batzuetatik bada ere". Nabarmendu dutenez, Txapeltxin egunaren bueltan badago zerbait antolatzeko asmoa, eta horretan jarriko dituzte indarrak.