Karmele Igartua aretoan elkartzeko gonbidapena jaso zuten Basotxo erretiratuen elkarteko zuzendaritza batzordeko kide izandakoek eta han batu ziren ia 50en bat kide eta haien beste hainbat senide. Garikoitz Iturbe alkatea ere lagun izan zuten, eskerrak emateko ekitaldian.
Elkarteko batzordeko gaur egungo kideek atzera begiratu gura izan zuten, nondik datozen gogorarazteko: "1981ean hasi zen Basotxoren historia. Eta elkartearen zimenduak jarri zituen batzorde eragilea osatu zuten Salustiano Errastik, Kalixto Erañak, Angel Gabilondok, Jose Jauregik eta Alejandro Arkauzek. Hurrengo urtean onartu zituzten estatutuak eta irailean jarri zuten martxan; dagoeneko 43 urte pasatu dira ordutik".
Estatutuetan jaso zuten Aretxabaletako jubilatu, pentsiodun eta elbarrituak batuko zituela elkarteak, bi helbururekin: "Batetik, horien guztien arazoak jaso eta bideratzen ahalegintzea, eta bestetik, euren arteko harremanak sendotuko zituen kultur eta aisialdi ekintza atseginak antolatzea".
Behin ibilbideari ekinda hiru fase izan dituela elkarteak aipatu zuten. Mitarte plazan, gaur egun Correos dagoen lekuan eman zituen lehen pausoak, bost urtez hain zuzen ere. 1987an, orain osasun zentroa dagoen lokalera lekualdatu zen, eta han, 35 urtez izan zuten egoitza erretiratuek. "Eta aurten, 2025ean, aldaketak ekarriko dituen fase berri batean sartu gara".
150 kide inguru zuzendaritzan
Ibilbide horretan 150 pertsona inguru pasatu direla zuzendaritza batzordetatik adierazi zuten, eta guztiak eskertu gura izan zituzten: "Gaur 50en bat izan zarete deituak. Gainerakoak, gure bihotzetan bai baina gure artean ez daude dagoeneko. Eskerrik beroenak guztioi. Mila esker zuen konpromiso, dedikazio eta ahaleginagatik; zuen partaidetza ezinbestekoa izan da ". Zuzendaritza batzordean egon ez arren beti laguntzeko prest izan diren horiek guztiak ere oroitu zituzten: "Horientzat ere gure eskerrik beroenak".
Gaur egun 950 bazkide ditu elkarteak eta herrian zeresan handia duen taldea dela gogorarazi zuten.